అమిత్ షా లేఖ‌తో ఏపీలో పుట్టిన మ‌రింత కాక‌

Breaking News

హోమ్        ఆంధ్రప్రదేశ్      న్యూస్

Updated:  2018-03-26 16:43:15

అమిత్ షా లేఖ‌తో ఏపీలో పుట్టిన మ‌రింత కాక‌

ఆంధ్ర‌ప్ర‌దేశ్‌ ముఖ్యమంత్రి చంద్రబాబుకి బీజేపి సారధి అమిత్ షా బహిరంగ లేఖ రాశారు.తాము రాష్ట్రానికి ఏమి చేశామో, అసలు బాబు రాజకీయంగా బీజేపి కి దూరంగా ఎందుకు వెళ్లారు లాంటి అంశాలు అందులో కీలకమైనవి. రాసింది కేంద్రంలోని కీలకమైన వ్యక్తికావడం వలన ఆ లేఖపై సమగ్ర చర్చ జరగాలి.
 
ఆత్మవిమర్శ‌ మరచి పరనిందకే పరిమితమైన అమిత్ షా.......
లేఖలో కీలకమైన విషయాలను సవివరంగా ప్రస్తావించిన షా కనీస ఆత్మవిమర్స లేకుండా కేవలం తప్పు అంతా బాబుదే అన్నట్లు మాట్లాడుతున్నారు. ఎవరు ఏమి చేశారు, ఏమి జరగాలి అన్నదానికి ప్రాతిపదిక విభ‌జన చట్టం 2014, హామీగా ఉన్న ప్రత్యేకహోదా. విభ‌జన చట్టం అమలుకు సంబందించి తాము అన్నీ చేశాము అన్నట్లుగా మాట్లాడారు. విభ‌జన చట్టంలో విద్యా, మౌళికవసతుల కల్పన అనేవి రెండుభాగాలు. 
 
1. విద్యారంగం.... కీలకమైన 11 సంస్దలను 13వ ప్లాన్ పూర్తయ్యేలోపు (2022) చేయాలి.  కానీ మేము 9 విద్యా సంస్దలను ఇప్పటికే పూర్తి చేశాము మిగిలిన రెండు కూడా చేస్తాం అన్నారు.9 సంస్దలలో వ్యవసాయ విశ్వవిద్యాలయం ఇంకా వివాదంలోనే ఉంది, దానికి ఎవరిది బాద్యతో చెప్పలేదు. షా ఇక్కడ ప్రజలను తప్పుదోవ పట్టిస్తున్న ఏమిటంటే 2022 కి ఇంకా సమయం ఉన్నది అని. చట్టం ప్రధాన ఉద్యేశం ఆ రోజుకి సంస్దలు పూర్తకావాలని కానీ శంకుస్దాపన చేసేస్తే చాలు పని అయిపోయినట్లు మాట్లాడటం సరికాదు.
 
2. మౌళిక వసతుల కల్పన..... చట్టంలో సాద్యసాధ్యాలను బట్టి చేయమన్నవి చేస్తున్నామని చెపుతూనే దుగిరాజపట్నం, కడప ఉక్కు సాధ్యం కాదని కమిటీలు నివేదిక లిచ్చాయి కాబట్టి చేయలేకపోయాము అంటూ కడపపై నిర్ణయం తీసుకోబోతున్నాము అని ముగించారు. చట్టంలో ఉన్నది ఏమిటి సాధ్య‌సాధ్యాల పరిశీలన విభ‌జన జరిగిన 6 నెలలలోపు పూర్తి చేయాలి. ఇంకా పరిశీలిస్తున్నాం అన్న మాటకు అర్దం ఉందా. కడప ఉక్కు సాధ్యం కాదు అని కమిటీ రిపోర్టు ఇచ్చింది అంటున్నారు. కమిటి సాధ్యం కాదు అని చెప్పడానికి కారణం ఏమిటి అన్న విషయాలు ప్రజల ముందు ఉంచకుండా కమిటీల పేరుతో కాలయాపన చేయడం సహేతుకం కాదు.
 
రాష్ట్రానికి రైల్వేజోన్ పరిశీలిస్తున్నాం అని షా ఇప్పుడు అంటున్నారు. చట్టానికి విరుద్దంగా విశాఖను మాత్రమే పరిశీలించి సాద్యం కాదు అని కేంద్ర హోంశాఖ ఎలా మాట్లాడుతుంది. చట్టం ప్రకారం గుంతకల్లు, విజయవాడ, గుంటూరును మొదట పరిశీలించాలి. అందుకు భిన్నంగా పరిశీలన చేసి సాద్యం కాదు అని చెప్పడం చట్టవ్యతిరేకం. దుగిరాజపట్నం పరిశీలించమని చట్టంలో లేదు. చాలా స్పష్టంగా 2018 మార్చి నాటికి మొదటి దశ పూర్తి కావాలని ఉంది. మళ్లీ పరిశీలించమనడంలో ఉద్యేశం ఏమిటి షా గారు చెప్పాలి.
 
చట్టంలో గాలేరు నగరి, హంద్రీ నీవా, వంశదార ప్రాజక్టులకు నిధులు ఇవ్వాలని ఉంది వాటి ప్రస్తావనే లేదు. హైదరాబాదులోని ఉమ్మడి ఆస్తుల వ్యవహారం అసలు షా దృష్టిలో లేనట్లుంది మరీ ముఖ్యంగా రాయలసీమ, ఉత్తరాంధ్ర‌లకు ప్యాకేజీకి సంబందించి మొదటి 3 సంవత్సరాలలో 1050 కోట్లు ఇచ్చాము అందులో 12 శాతం మాత్రమే వాడుకోవడం ఆశ్చర్యకరం అన్నారు. నిజమే 12 శాతం వాడటం రాష్ట్రం తప్పు అయితే అసలు ప్యాకేజీ ఎంతో చెప్పకుండా వెనుకబడిన జిల్లాల అభివృద్దికి ఏటా జిల్లాకు 50 కోట్లు ప్రకటిస్తే రాష్ట్రం ఏమి ప్రణాళిక రూపొందిస్తుంది షా  చెప్పాలి. షా  చెప్పిన విషయాలలో ముఖ్యమైనది పన్నుల వాటాను 32 శాతం నుంచి 42 శాతంకు పెంచడం వలన భారీ లబ్ది చేకూరింది అని ఈ విషయంలో కచ్చితంగా కేంద్రం నిర్ణయాన్ని స్వాగతించాల్సిందే. కానీ అది విభ‌జన చట్టానికి సంబందించిన విషయం కాదు.
 
అమరావతి... అమరావతికి ఇప్పటికే 2500 కోట్లు కేంద్రం ప్రకటించింది అందులో 8 శాతం మాత్రమే రాష్ట్రం వాడుకుంది. ఇంకా నిధులు ఎలా అడుగుతారు అంటున్నారు. చట్టం ఏమి చెప్పింది శివరామక్రిష్ణన్ నివేదిక ఆధారంగా రాష్ట్రానికి కేంద్రం సూచనను ఇవ్వాలి. తాము ఏమి సలహా ఇచ్చింది. రాష్ట్రం ఏమి తప్పు చేసింది షా చెప్పలేదు. అంటే రాష్ట్రం తప్పు చేస్తుంటే చూసి మౌనంగా ఉండి హక్కులు అడిగినపుడు తప్పులు ప్రస్తావించడమా ?
 
పోలవరం... పోలవరం బాద్యత కేంద్రానిది  రాష్ట్రం అడిగితే ఎందుకు ఇచ్చా. మా బాద్యతను మేమే చేస్తాం అని చెప్పకుండా రాష్ట్రం అడగడం మీరు ఇచ్చి చేతులు దులుపుకోవడం బాద్యత అనిపించుకుంటుందా. హోదా విషయంలో రాజకీయ పార్టీలు ప్రజల భావోద్వేగాలను రెచ్చగొడుతున్నాయి. నిజమే మరి 2014 లో తమరు చేసిన ఘనకార్యం అదే కదా ? నాడు మీరు లబ్ది పొందారు.  నాడు మీరు చేసిన రాజకీయాన్నే నేడు మిగిలిన పార్టీలు చేస్తున్నాయి. ప్రధానమైన ఆరోపణ‌ వినియోగం నివేదిక రాష్ట్రం ఇవ్వలేదు. మరి బాబు మీకు దూరం అయ్యేవరకు మౌనంగా ఉండి దూరం అయిన తర్వాత మాట్లాడటం బాద్యత అవుతుందా. మొత్తంగా బాబు తమకు దూరం కావడానికి ప్రదాన కారణం రాజకీయ సమీకరణాలే అనడం మాత్రం వాస్తవానికి దగ్గరగా ఉంది. కానీ బాబు నేడు కూడా బీజేపీ కి దూరంగా వెళ్ల‌కుండా ఉండి ఉంటే మాత్రం సర్దుకుపోయి ఉంటారన్న విషయాన్ని పరోక్షంగా చాలా బాగా చెప్పిన షా గారికి అభినందనలు.
 
బాబు స్పందించాలి.... షా తనకు రాసిన లేఖపై సెంటిమెంటు రాజకీయాలు చేయకుండా బాబు సూటిగా సమాదానం చెప్పాలి. తమవైపు జరిగిన తప్పుకు బాద్యత తీసుకోవాలి. కేంద్రం ఎక్కడ తప్పు చేసిందో వాటిని అడగాలి. మొత్తంగా అమిత్ షా రాసిన లేఖ ఆధారంగానైనా రాష్ట్రంలోని ప్రజలు వాస్తవాలను సమగ్రంగా పరిశీలించాలి. కేంద్ర, రాష్ట్ర ప్రభుత్వాలు ఆడుతున్న నాటకాలను అర్దం చేసుకోవాలి.  తమ రాజకీయ హోదా కోసం చేసే ఉద్యమాలకు బలి కాకుండా తమ జీవిత హోదా కోసం ఉపయోగపడే అంశాలపై  ప్రజలు ఉద్యమించాలి.
 
యం. పురుషోత్తంరెడ్డి.
 

షేర్ :

Comments

0 Comment

తాజా వార్తలు

Copyright © Janahitham. All rights reserved. Designed by Aakruti.