సీమ ప్రాజెక్టులకు ఏ నిదులు కేటాయిస్తారు బాబుగారు.

Breaking News

హోమ్        ఆంధ్రప్రదేశ్      న్యూస్

chandrababu naidu polavaram project
Updated:  2018-03-22 06:28:31

సీమ ప్రాజెక్టులకు ఏ నిదులు కేటాయిస్తారు బాబుగారు.

చంద్రబాబుగారి రెండు కళ్ల‌ సిద్దాంతం అంతిమంగా రాయలసీమకు నష్టం జరుగుతుందని రాయలసీమ రైతు సంఘాలు, మేధావులు చేసిన హెచ్చరికలు నిజమవుతున్నాయి. బాబుగారి రెండు కళ్ల‌ సిద్దాంతం అంటే అమరావతి- పోలవరం. ఒక దానిని రాయలసీమకు అన్యాయం చేసి నిర్మిస్తుంటే మరోకటి క్రిష్ణా, గోదావరి డెల్టాలకు 3 పంటలకు నీరు ఇచ్చే గొప్ప ప‌థ‌కం. రెండూ కూడా రాయలసీమకు నేరుగా ఉపయోగపడే అంశాలు కావు అందుకే మొదటి నుంచి రాయలసీమ వాదులు డిమాండ్‌ చేస్తున్నది బాబుగారి అభివృద్ది నమూనా సీమకు అంగీకారం కాదు అని. నిజానికి పోలవరం పూర్తిగా కేంద్రం నిధులతో పూర్తి చేయాల్సిన ప్రాజెక్టు. రాజధాని తొలి ద‌శ పనులు కేంద్రం సహకారంతో చేపట్టాలి.
 
అలా విబజన చట్టం. కోస్దా ప్రాంతానికి ఒక వరం. కేంద్రం చేపట్టాల్సిన రెండు పనులకు ఒక్క రూపాయి కూడా రాష్ట్రం నుంచి ఖర్చు చేయడం మంచిది కాదు కారణం 1. రాష్ట్రం దగ్గర ఉన్న నిధులకు పరిమితులు ఉన్నాయి. ఆ కొద్దిపాటి నిదులను కూడా కేంద్రం చేయాల్సిన పనులకు వెచ్చించితే ఇక వెనుకబడిన రాయలసీమకు ఖర్చు చేయాడానికి ప్రభుత్వం దగ్గర మాటలు తప్ప నిధులు ఉండవు. 2. కొంత ఆలశ్యం అయినా కేంద్రం నిదులతో నిర్మిస్తేనే మంచిది. ఎందుకంటే వారి నిబంధ‌నల ప్రకారం నిధులు విడుదల చేస్దారు. రాష్ట్రం తన పద్దతులలో నిర్మాణాలు చేస్తే వాటికి ఏదో కారణం చెప్పి కేంద్రం నిధులను ఇవ్వడం నిరాకరస్తే మొదటికే ప్రమాదం. కనుక తొందరపాటు నిర్ణయాలు చేయకుండా రాజధాని, పోలవరం ను కేంద్రం సహకారంతోనే చేపట్టాలి.
 
రాజధాని- పోలవరం అత్యవసరమా  ?- సీమ ప్రాజెక్టులు అత్యవసరమా ?
బాబుగారు  పోలవరం, రాజధాని పనులకు సొంత నిధులను వెచ్చించడానికి కారణం అనుకున్న కాలానికి పూర్తి చేయడానికి కేంద్రం సహకరించడంలేదు కనుక కేంద్రం నిధుల కోసం వేచి చూసి రాష్ట్ర ప్రయోజనాలను ఇబ్బంది పెట్టడం ఇష్టం లేదు. వినడానికి బాగానే ఉంటుంది. అంత తొందరగా చేయాల్సిన  అవసరం రాజధాని, పోలవరం విషయంలో ఉందా ? ఉన్నా అది సాధ్య‌మా ? అన్నది మౌళికమైన ప్రశ్న. 
 
1. బాబుగారు ఎంత తొందర పడ్డా రాష్ట్రం నిధులతో పోలవరం పనులు 2019 కి పూర్దికావు. ప్రభుత్వం లెక్కల ప్రకారమే 52 వేల కోట్లు పోలవరంకు అవసరం అవుతాయి తన చివరి బడ్జెట్ లో బాబుగారు పోలవరంకు కేటాయించింది అక్షరాలా 9 వేల కోట్లు మరి 2019 కి ఎలా పూర్ది చేస్తారు. అదే విధంగా రాజధాని నిర్మాణం కూడా సుదీర్గ కాలం చేపట్టే వ్యవహరం.  2. రాష్ట్రం తన ప్రాధాన్యతలో ఉండాల్సింది ప్రపదంగా వెనుకబడిన ప్రాంతాలు. ప్రభుత్వం లెక్కల ప్రకారమే రాష్ట్రంలోని కరువు మండలాలలో 90 శాతం రాయలసీమవే. పత్రికల కధనాల ప్రకారం ఒక లక్ష మంది బ్రతుకు కోసం సీమ నుంచి వలస వెళ్లారు. 
 
సీమలో బ్రతకలేక బలవన్మరణాలు ప్రతిరోజు వినిపిస్తున్నాయి. అంతేకాదు ఐక్యరాజ్య సమితి లెక్కల ప్రకారం సీమలో త్రాగునీటి సౌకర్యంలేక దాదాపు 50 శాతం పిల్లలు బలహీనంగా పుడుతున్నారు. ఇవి చాలవా బాద్యత గల ప్రభుత్వానికి సీమను తొలి ప్రాధాన్యతగా ఎంచుకోవడానికి. పోనీ బాబుగారి ప్రధాన లక్ష్యాలైన పోలవరం, రాజధాని శరవేగంగా పూర్తి అయిపోతే నేరుగా సీమ సమస్య‌లకు పరిష్కారం లభిస్తుందా అంటే అదీ లేదు. పోలవరం పూర్తి అయితే గుంటూరు, క్రిష్ణా, ఉభ‌యగోదావరి, విశాఖ నగరానికి నీటి సమస్య‌కు ఒక శాశ్వత పరిష్కారం లభిస్తుంది.
 
అంత కన్నా తక్కువ ఖర్చుతో సీమలోని గుండ్రేవులా, సిద్దేశ్వరం, సమాంతరకాలవ, వేదవతి, జొలదరాశి, ఆదినిమ్మాయన పల్లి బ్యారేజీ, గాలేరు నగరి, హంద్రీ నీవా లు పూర్ది చేయవచ్చు. అంతా కలిపి  20 వేల కోట్లు లోపే దాని వలన కలిగే ప్రయోజనం చిత్తూరు, కడప, కర్నూలు, అనంతపురం, ప్రకాశం తో బాటూ కొంత మేరకు నెల్లూరుకు కూడా అంటే పోలవరం పూర్తి అయితే ప్రయోజనం పొందే జిల్లాతో సమానంగా సీమ ప్రాజెక్టులను అందులో సగం నిధులతో నిర్మిస్తే అంతకన్నా ఎక్కువ జిల్లాలు ప్రయోజనం పొందుతాయి. ప్రజలకు మాయమాటలు చెప్పి ఎక్కడ ప్రాజెక్టులు నిర్మించినా అది రాయలసీమ కోసం అంటూ అవగాహన లేని జనాన్ని మోసం చేయడం తగదు. పోలవరంకు సీమ ప్రజలు వ్యతిరేకం కాదు. ఎలాగో పోలవరం కేంద్రం నిర్మించి ఇవ్వాలి ఓపికగా రాజకీయ ఎత్తులు పై ఎత్తులూ వేయడం ఆపి హక్కుగా ఉన్న పోలవరంను కేంద్రం నిధులతో పూర్తి చేయాలి. రాష్ట్రం తన దగ్గర ఉన్న నిధులను సీమ ప్రాజెక్టులకే వెచ్చించాలి.
 
 
యం. పురుషోత్తంరెడ్డి
రాయలసీమ మేధావుల పోరం
తిరుపతి. 9490493436
 
 

షేర్ :

Comments

0 Comment

తాజా వార్తలు

Copyright © Janahitham. All rights reserved. Designed by Aakruti.